The Afrikaner Cattle Breeders' Society of South Africa

The Society ► BRIEF AAN VOORNEMEND STOETTELERS [ KLIEK HIER VIR DIE AFRIKAANSE WEERGAWE ]
---------------------------------------------------------------------------------------------------------------------------------------------------------------------------------------------------------------------------------

Waarde Heer/Dame

AANSOEK OM LIDMAATSKAP

Die Bestuur van ons Genootskap het met waardering verneem dat u in lidmaatskap van die Genootskap belangstel. Voltooi gevolglik asseblief die meegaande aansoekvorm. Let daarop dat ons geen aansoek aanvaar sonder die nodige bewyse van betalings aan die Genootskap sowel as SA Stamboek nie.

Ons moet u daarop wys dat alvorens lidmaatskap aanvaar word, ŉ erkende stoetteler van die Genootskap of een van ons tegniese beamptes die applikant moet besoek om die saak met hom/haar te bespreek en seker te maak dat die nodige fasiliteite vir stoetteling beskikbaar is, soos byvoorbeeld kampe, krale, ŉ drukgang, ŉ skaal, ensovoorts. Sodra u voltooide aansoekvorms dus ontvang is, sal ons met ŉ persoon in u omgewing of een van ons beamptes reël om u vir hierdie doel te kom besoek.

STOETNAAM

Ooreenkomstig die Wet op die Registrasie van Stamboekvee is dit verpligtend vir elke lid om 'n stoetnaam (voorvoegsel) te registreer. Die Stamboekvereniging het die alleenreg om sulke stoetname te registreer. Aangesien daar reeds duisende name vir telers van alle rasse geregistreer is en aangesien die name van dorpe en stede nie as ŉ voorvoegsel registreerbaar is nie, versoek ons u vriendelik om aan ons ŉ lys van name in voorkeurvolgorde van u keuse in te stuur waarvan een moontlik vir u as voorvoegsel geregistreer kan word. Aangesien die meer algemene stoetname reeds vir ander telers geregistreer is, beveel ons aan dat u die keuse van name so oorspronklik as moontlik maak.

MINIMUM PRODUKSIEVEREISTES VIR DIE AFRIKANER OOREENKOMSTIG DIE KONSTITUSIONELE VEREISTES

Daar moet aan die volgende minimum produksievereistes voldoen word:

1. REPRODUKSIE

1.1	ŉ Vers moet die vir die eerste maal VOOR of OP 42 maande ouderdom kalf. Dié vereiste geld vir alle verse wat na 1 Januarie gebore is.
1.2	Geen tussenkalfperiode mag 790 dae oorskry nie.
	•	Die Genootskap, in samewerking met SA Stamboek, sal jaarliks die reproduksiestatus van alle vroulike diere nagaan.
	•	Diere wat nie aan die minimumvereistes voldoen nie, sal geïdentifiseer word. Probleemgevalle sal skriftelik aan die eienaar bekend gemaak word. Hierna het die eienaar drie maande tyd om die probleemgevalle aan te spreek en die nodige terugvoer aan die Genootskap te gee. Indien die kantoor geen skriftelike vertoë of versagtende redes vir probleemdiere ontvang nie, het die Genootskap die reg om SA Stamboek in kennis te stel dat geen verdere kalwers van die koei vir registrasie aanvaar mag word nie en die dier gekanselleer word.
1.3	Vroulike diere moet aan die onderstaande minimum vrugbaarheidsvereistes voldoen. Die eienaar sal drie maande gegee word om te reageer, waarna die Genootskap aan SA Stamboek sal opdrag gee om die nodige onherroeplike kansellasies te doen, waarna geen verdere kalwers van die betrokke koei sal aanvaar word nie.

Aantal kalwings	Maksimum gemiddelde tussenkalfperiode (TKP) van koei
2	730 dae
3 en 4 kalwings	660 dae
5 en meer kalwings	500 dae

2. MELKPRODUKSIE

2.1 ŉ Koei wat meer as twee kalwers speen met ŉ indeks onder 90 sal summier geprul word.
(Nie ŉ afkeuringsvereiste nie, maar moet bloot as riglyn vir melkproduksie gebruik word)

3. GROEIVERMOË

(Deelname aan Prestasietoetsing is verpligtend vir alle Kategorie A-lede, waar indekse as riglyne vir die eienaar en die keurder dien.)

3.1	Verse (Fase B)
	a.	Speenindeks 90
	b.	Jaarindeks 90
	c.	18- maande-indeks 90
	Indien verse voor 18 maande gekeur word, sal ŉ jaarindeks vereis word. Andersins sal ŉ speen- en 18-maande- indeks vereis word. Indien een indeks onder 90 is, maar die gemiddeld van die beskikbare indekse 90 of hoër is, sal die dier gekeur word indien die voorkoms besondere meriete het.

3.2	Bulle (Fase B)
	a.	Speenindeks 90
	b.	Jaarindeks 90
	c.	18-maande-indeks 90
	d.	Skrotumomvang minstens 30 cm.
	Geen bul sal voor 18 maande ouderdom gekeur word nie en geen uitsondering sal gemaak word nie.

3.3	Bulle (Fase C en D)
	a.	Speenindeks 90
	b.	Daaglikse groei-indeks (GDT) minstens 90
	c.	Groei-per-dag-van-ouderdom-indeks (GDO) minstens 90
	d.	ŉ Skrotumomvang minstens 30 cm
	Bulle sal direk na afsluiting van ŉ toets as ŉ groep gekeur word . Alle afgekeurde bulle moet geslag word.

3.4	FUNKSIONELE VOORKOMS
	3.4.1	Diere met die volgende genetiese afwykings sal uitgeskot word:
	a.	Hipoplastiese testes
	b.	Skewe gesig
	c.	Kort en lang onderkaak
	d.	Wollerige haarkleed
	e.	Laminitus
	f.	Erflike stertkinkel aan boonste helfte van stert
	g.	Wilde temperament
	h.	Enige ander duidelike genetiese afwykings.

	3.4.2	Die volgende uiterstes sal geprul word:
	a.	Swak konstitusie
	b.	Swak bespiering
	c.	Bulle met vroulike of os-agtige voorkoms
	d.	Verse met manlike of os-agtige voorkoms
	e.	Ponietipes of uitermate groot diere
	f.	Baie fyn of uitermate growwe bene
	g.	Uitermate regop, sekel- of koeihakkig
	h.	Duif- of eendtonig, voorpote, krom voorbene
	i.	Verse met gebrekkige uierontwikkeling
	j.	Enige ander uiterstes

Alle amptelike prestasiegegewens en besonderhede van diere moet tydens keuring beskikbaar wees.
Bulle of vroulike diere waarvan die moeders nie binne bostaande norme ten opsigte van reproduksie presteer nie, mag nie op veilings wat in samewerking met die Genootskap gehou word, verkoop word nie.

PRESTASIETOETSSKEMA

Ons Genootskap beskou prestasietoetsing as baie waardevol om lede te help om hul diere op die mees effektiewe wyse te selekteer. Dit word dus van lede verwag om by die prestasietoetsskema in te skakel en dit is dan ook besluit dat lede nie later as drie jaar na aanvangs van stoetteling by die skema moet aansluit nie.

Die beamptes van die Genootskap het ook opdrag ontvang om ons lede met inskakeling by die skema sowel as hul rekordhouding in verband met prestasietoetsing behulpsaam te wees. Deelname aan Fase A en B van die skema is verpligtend.

TATOEËRING VAN DIERE

Soos in die Verordeninge uiteengesit, moet alle diere binne 60 dae na geboorte met ŉ nommer in die linkeroor getatoeëer word. ŉ Tweede kenmerk, hetsy brand, oorkode of oorplaatjie wat met die tatoeëernommer ooreenstem, moet ook op die dier aangebring word. ŉ Sleutel tot die oorkodestelsel word aangeheg. Indien ŉ teler van oorplaatjies gebruik maak, moet die plaatjies in die regteroor aangebring word.

Dit word ook deur die Wet vereis dat alle kalwers met ten minste twee letters (kuddemerk) in die linkeroor getatoeëer moet word, bo en behalwe die tatoeëernommer. Aangesien die Genootskap self die kombinasies van letters (kuddemerk) aan lede toeken, sal ŉ kombinasie vir u geregistreer word sodra u aansoek om lidmaatskap ontvang word. Op een van die stelle vorms wat aan u gestuur word, is voorsiening gemaak vir kombinasies van letters in die volgorde van u keuse.

Die tatoeëernommer (volgnommer), jaarnommer en kuddemerk kan as volg in die oor aangebring word (byvoorbeeld vir ŉ dier in 1981 gebore met die volgnommer 123 en die kuddemerk AB):

AB81	OF	123
123	OF	AB81

In dié verband moet u ook asseblief die ingeslote besonderhede in verband met die merk van diere bestudeer. Die vorm wat betrekking het op u keuse vir die metode waarvolgens u u diere sal merk, moet asseblief ingevul en saam met die aansoekvorms aan ons gepos word.

Die Genootskap voorsien nie tatoeëertange nie. U kan dit van u koöperasie of ander firma wat veemiddels verkoop, verkry.

KALFRAPPORTE

Die Genootskap verskaf kalfboeke met vorms wat dien as kennisgewings van geboorte van kalwers en aansoekvorms om registrasie. Die vorms is in tweevoud en die oorspronklike vorm (die wit vorm) moet binne 90 dae na die geboorte van die kalf aan die kantoor gestuur word.

ŉ Kalfrapportboek sal aan u gepos word nadat u lidmaatskap gefinaliseer is. Indien daar intussen kalwers van geregistreerde of registreerbare koeie aankom, moet u ons asseblief per brief van die geboorte in kennis stel deur die nommer van die koei sowel as die geboortedatum en geslag van die kalf te verskaf sodat die kalf voorlopig genoteer kan word. Sodra u die nodige kalfboeke ontvang, moet u kalfrapporte invul vir al die kalwers wat by u gebore word (insluitend dié waarvan die geboortes per brief gerapporteer is) en dit aan die kantoor stuur.

HULPSTAMBOEKDIERE

ŉ Hulpstamboek vir suiwergeteelde Afrikaners is oopgestel. Suiwergeteelde vroulike diere kan ná inspeksie en indien goedgekeur, in die Hulpstamboek opgeneem word en kwalifiseer na twee geslagte vir opname in die Volgeregistreerde Stamboek.

Indien u suiwergeteelde Afrikanerverse of -koeie besit wat u graag vir die Hulpstamboek wil laat keur, moet u ons asseblief verwittig, in welke geval ons vir die keuring van u diere sal reël.

AANKOOP VAN DIERE

Wanneer telers geregistreerde of registreerbare diere aankoop, is dit gebiedend noodsaaklik dat hulle die kenmerke op die beeste moet vergelyk met die kenmerknommers op die dokumente van die diere. Indien daar enige bees is waarvan die kenmerk nie ooreenstem met die kenmerknommer op die dokument nie, sal die Genootskap weier om die dier na u naam oor te dra en moet u dadelik die saak met die verkoper opneem.

GELDE BETAALBAAR

a.	Jaarlikse Lidmaatskap - R500,00 + BTW.
b.	Kuddegelde. Kuddegelde word jaarliks gehef op alle manlike en vroulike diere twee jaar en ouer wat volgens die rekords van die Genootskap op 1 Maart elke jaar in 'n lid se besit is. Die kuddegelde beloop tans R48,00 per dier per jaar met 'n minimum van R500,00 plus VAT vir 1-10 diere. Boetes op laatgeboortekennisgewings word ook gehef in die geval van 92 dae en 2 x 10 dae oorskrydings

NB: BTW sal gehef word op gemelde fooie.
Bedrae onderhewig aan verandering soos op Algemene Jaarvergadering besluit.

IDENTIFIKASIE VAN STAMBOEKDIERE

Volgens die bepalings van die Konstitusie is dit verpligtend dat alle kalwers wat van geregistreerde ouers aankom, binne 60 dae na geboorte met die identifikasiemerke soos deur die Genootskap voorgeskryf, getatoeëer word.

Hierdie merke bestaan uit die volgende:

1.	Die kuddemerk soos deur die Genootskap aan elke teler toegeken vir sy uitsluitlike gebruik. Hierdie merk bestaan uit twee of drie letters wat in die dier se LINKEROOR saam met die driejaarsyfer (sien no. 3) en die volgnommer van die dier (sien no. 2) aangebring moet word.
2.	Die volgnommer van die dier wat in die linkeroor saam met die kuddemerk (sien 1 hierbo) en die jaarsyfer (sien 3) getatoeëer moet word.
3.	Die jaarsyfer wat saam met die kuddemerk en volgnommer in die oor aangebring moet word, naamlik die syfer 91 vir die jaar 1991, 92 vir die jaar 1992, ensovoorts. Die kuddemerk, jaarsyfer en volgnommer kan as volg aangebring word (byvoorbeeld vir ŉ dier met die kuddemerk AB, gebore in 1991 met volgnommer 123).

AB91	OF	123
123	OF	AB91

	U kan enigeen van die volgende metodes kies om u diere te merk:

	a.	Om elke jaar by no.1 te begin. Die bulle en verse wat in ŉ spesifieke jaar gebore word, kan dan met een reeks genommer word. Met ander woorde, slegs een kalfboek word gebruik, in welke geval no.1 ŉ bulkalf en no.2 ŉ verskalf kan wees, ensovoorts, tot aan die einde van die jaar. U begin dan op 1 Januarie van elke kalenderjaar weer by no.1 en hou met die reeks aan tot 31 Desember van daardie jaar. Indien u egter verkies om die bulle jaarliks van no. 1 af met ŉ reeks te merk en die versies ook van no.1 af met ŉ aparte reeks, kan dit gedoen word. In albei metodes hierbo na verwys, moet dit duidelik verstaan word dat die reeks afsluit met die geboorte van die laaste kalf tot op 31 Desember van die spesifieke jaar.

	b.	Om by no.1 te begin en aan te gaan tot no.999 en dan weer by no. 1 te begin. U kan hier ook een gesamentlike reeks gebruik vir bulle en verse of u kan ŉ aparte reeks 1 tot 999 vir bulle en ŉ aparte reeks 1 tot 999 vir verse gebruik. As u op hierdie metode besluit, moet die nommers aangaan tot die nommer 999 bereik word, al neem dit ook jare. U kan dan nie voor die tyd weer na no.1 oorskakel nie. U moet asseblief die vorm in verband met die merk van diere wat by die lidmaatskapvorms aangeheg is, voltooi deur u keuse aan te dui en dit saam met die aansoekvorms om lidmaatskap aan ons pos. Die metode wat u verkies, word só op die rekenaar vasgelê en dit sal dan in die toekoms vir u verpligtend wees om van die betrokke metode gebruik te maak.

4.	Bo en behalwe die tatoeëring moet ŉ tweede identifikasiemerk op die diere aangebring word. Hierdie merk mag enigeen van die volgende wees:
	a.	Oorkodesnye wat die tatoeëernommer aandui, of
	b.	ŉ Oorplaatjie in die regteroor met die nommer van die dier daarop aangebring, of
	c.	ŉ Brandnommer, dieselfde as die tatoeëernommer. Die brandnommer word gewoonlik aangebring wanneer die dier oud genoeg is, maar in elk geval voor inspeksie vir registrasie.

	Telers kan dus enigeen van bogenoemde metodes saam met die verpligte tatoeëring vir die merk van diere gebruik.

OORKODESTELSEL

Die oorkodestelsel (sien aangehegte voorbeeld) moet gebruik word indien u verkies om kodesnye in plaas van oorplaatjies te gebruik of om u diere te brand. Die tatoeëring, soos reeds uiteengesit, is verpligtend. Die Primrose McConnel-stelsel, waarvan ŉ voorbeeld aangeheg word, is die enigste stelsel wat deur die Genootskap aanvaar word.

Dit moet duidelik verstaan word dat die snye wat die eenhede aandui in die linkeroor, en die snye wat die tientalle aandui, in die regteroor van die dier aangebring moet word. Om die kode te lees, moet die teler voor die dier staan en dit moet in gedagte gehou word dat die dier se regteroor aan die linkerhandse kant van die teler is en die linkeroor aan die regterhandse kant van die teler.

Die snye vir die eenhede en tientalle kom altyd aan die buitenste gedeelte van die dier se oor, terwyl die snye wat die honderde aandui, aan die binnekant van die oor, d.w.s. naby die kop aangebring word.

BRAND

Geskikte brandysters is nodig om die diere te brand. Die brand word gewoonlik op die linker- of regterblad, die linker- of regterboud, of die linker- of regterheup aangebring. Daar is dus geen beperking op die plek waar die brand aangebring mag word nie.

Dit is wenslik dat die letters of syfers waarmee gebrand word, nie minder as 5 cm lank moet wees nie en dat die hoeke taamlik gedraai moet wees. Dit is ook wenslik dat die hare vooraf verwyder word van die oppervlak waar die brand aangebring word.

Om identifikasie in die veld te vergemaklik, is dit wenslik om die jaarnommer op die dier te brand, veral wanneer kodeknippe as tweede merk saam met die tatoeëernommer gebruik word.

Telers wat ŉ brandnommer as tweede merk saam met die tatoeëernommer gebruik, kan dan die jaarnommer bokant of onderkant die volgnommer brand, of op die blad, soos verkies word.

HOE OM ’N TATOEËERTANG TE GEBRUIK

1. VOORBEREIDING VAN ’N TANG
	a.	Die tang en syfers moet behoorlik skoon wees.
	b.	Sit die syfers in die tang in die gewenste posisie en toets die tang op ŉ stuk papier voordat u dit gebruik ten einde vas te stel of die syfers reg aangebring is.

2. BENODIGDHEDE
	a.	ŉ Blik gewone stoofpolitoer of tatoeëerpasta (Zebra-stoofpolitoer is ŉ baie gewilde merkstof.)
	b.	ŉ Sagte borsel of stewige kwassie. Indien stoofpolitoer gebruik word, moet dit in pastavorm gebruik word.

3. HOE OM TE TATOEËER
	a.	Smeer die tatoeëersyfers deeglik met die pasta deur gebruik te maak van die kwassie.
	b.	Plaas die oor dan in die regte posisie (sien skets) tussen die kake van die tang.
	c.	Druk die kake van die tang skielik en stewig saam totdat die syfers dwarsdeur die oor knip

OPMERKINGS
	a.	Dit maak nie saak as die pasta aan die syfers droog word voordat die tatoeëring plaasvind nie.
	b.	Moenie die oor probeer vryf voor tatoeëring nie – deur die oor te vryf, stimuleer u die bloedomloop wat uitwissing van die tatoeëermerke mag veroorsaak.
	c.	Moenie tatoeëer as die oor vol bosluise is nie: sorg eers dat die oor vry is daarvan. Die oppervlakte van die oor moet gesond wees.
	d.	As die oor vuil is, kan die oppervlakte wat getatoeëer moet word net effens met die duim of ŉ lappie in brandspiritus gedoop skoongemaak word.

SKETS: Binnekant van die linkeroor

HOE OM DIE TATOEËERTANG TE GEBRUK:

Hiermee aangeheg die bylae soos op datum wat ek dit het. Indien moontlik, kan oom dalk net seker maak of alles reg verander is en dalk die nodige voorstelle vir veranderings aanbring.

1.	Die tatoeëertang moet sorgvuldig tussen die kraakbeenriwwe aangebring word.
2.	Die stippellyn wys die regte posisie van die syferkaak van die tang aan.
3.	Die merk kan in die middelste of onderste vlak van die oor aangebring word, maar verkieslik in die middelvlak.
4.	Dit word aanbeveel dat indien telers die tatoeëerletters en syfers in een ry tatoeëer, en die syfers eerste geplaas word sodat dit nie aan die haarbedekte punt van die oor raak nie, bv.123AB. die letters kan ook onder of bo die syfers aangebring word, byvoorbeeld

AB91	OF	123
123	OF	AB91