99 Jaar wat ons reeds bestaan! Wonderlik! Kom ons kyk terug wat het die afgelope jaar alles gebeur. Die verslag gaan ek dan ook doen onder verskillende hoofde met elke bestuurslid verantwoordelik vir elke portefeulje:

1)         Kantoor. (Pierre Fouché & David van der Linde)

Met Herman en Lauren aan die stuur van die kantoor het sake glad verloop. Probleme, navrae, notules en opdragte is vinnig afgehandel. Herman se bedanking het ons  onkant gevang, maar hy is darem nie heeltemal verlore vir die genootskap nie. Die raad het hom gekoopteer op die bestuur en sal op ‘n deeltydse grondslag betrokke bly by genootskap. Hy sal help met artikels, boeredae ens. Baie dankie Herman! Hy het ook aangesluit as volwaardige lid by die Afrikaners en Afrisims, baie geluk.

Lauren het haar eerste joernaal puik opgestel en baie geluk daarmee.

2)         Rasdirekteur (Herman Duvenage)

Herman het gesorg vir artikels in Veeplaas, Landbouweekblad, Farmers’ Weekly en ander tydskrifte. Hy het letterlik die land deurkruis van die Noorde tot die Suide, asook SWA besoek. Hy het Botswana ook besoek vir moontlike markte net om u ‘n idee te gee, die volgend statistieke:
Persone besoek: 81, waarvan 18 kommersiële telers was en 63 Stoet telers
Km gereis vir die jaar: 79612km
Elke maand is daar ‘n verslag gedoen en ‘n maandprogram ingedien by Bestuur.

3)         Bemarking (Dr. Pieter de Kock)

Nuwe pamflette word opgestel. Reël van ‘n groot perskonferensie in Bloemfontein oor afrikaner vleis se voordele bv. sagtheid van vleis, lae kolesterol, inhoud van vleis, ens. Daaruit vloei ‘n paar radio onderhoude en baie goeie terugvoer. Die Pers Konferensie verskyn ook in die Volksblad en die Landbouweekblad en ons hoop die konferensie sal werklik ‘n inpak hê vir Afrikaner Veldvleis.

4)         Finansies (Neels van Rooyen)

Die uitgawes is goed bestuur, daarom dat die werklike uitgawes en die begroting klop. Daar is wel van die belegging aangewend, maar ons finansies is nog gesond.

5)         Veldvleis (Obie du Plessis)

Obie vergewis hom van standaarde of vereistes van veldvleis in VSA. Hy woon ook kongres by op sy eie onkostes in die VSA. Individuele persone begin Afrikaner vleis bemark en die Cloete’s van Vryburg deel met die genootskap ‘n mark in die Rand met ‘n premie.

Veldvleis is ‘n projek wat dalk vir ons voel moet vinniger vorder maar dan moet daar meer finansiële voordele wees.

6)         Infusie (Estienne Cronjé)

Die projek word in samewerking met die genootskap gemonitor en beheer. Die teelbeleid word streng toegepas en Stamboek help baie in die verband. F4 diere word vir finale voor ‘n keurkomitee van die genootskap vir goedkeuring voorgelê. n Volledige verslag is saamgestel oor die verloop van die Infusie projek oor die jare t.o.v. van speen gewig, groei en reproduksie. Die bevindinge en verslag sal met die Infusie lede bespreek word waarna ‘n verslag aan die bestuur voorgelê sal word.

7)         Afrisims (Julian Balt)

Lynton Vermaak word tot nuwe voorsitter verkies. Baie geluk aan hom. Die teelbeleid word verfyn. Daar is groot moontlikhede vir uitbreiding, huidig staan ons op 12 lede en 1145 diere.

8)         Tegnies (Chris Goosen, Martin Ras, Estienne Cronjé & Herman Duvenage)

Beoordelaars kursusse word aangebied op verskillende plekke. Die bestuur het een vergadering net afgestaan om bees te praat. BAIE positiewe gedagtes het vorendag gekom en sal gedeel word met lede op die komende boeredag. Senior keurders sal ‘n dag by mekaar kom en keurings sal in klubverband gedoen word vir volgende jaar, keurings sal ook met ‘n vaste program plaasvind.

9)         Klubs (Julian Balt)

Elke klub voorsitter sal die geleentheid kry om tydens die AJV ‘n verslag te doen oor sy klub se aktiwiteite die afgelope jaar. Dankie aan Noordwes klub vir die goeie uitstalling op Nampo . Die stalletjie het baie navrae en belangstelling uitgelok.

10)       LNR (Siebert Vermeulen)

Geluk aan Willie & Susan Cloete met die besonderse prestasie van die toekenning van Farmers’ Weekly “Best productive cow award”

Baie geluk aan Juwel of Africa met die bul wat die Afrisims op Pretoria Skou by die Fase C prestasietoetsklas verteenwoordig het.

Siebert lewer goeie insette op die raad, help met die  trek van rekords oor produksie syfers en spreek die raad aan oor eie rekord houdings.

11)       Veilings (Bestuur)

Die raad voel dat daar strenger beheer uitgeoefen moet word met veilings. Die standaarde vir veilings sal ook al hoër gestel word vir veilingsdiere wat aangebied word.

NW veiling:
            Hoogste Prys behaal: R60 000                        Omset: R2.13 miljoen

Potch Produksiegroep veiling:
            Hoogste prys behaal: R33 000                        Omset: R391,500

Hoopstad Veiling:
            Hoogste prys behaal: R36 000                        Omset: R1.64 miljoen 

Afrisim Veiling:
            Hoogste prys behaal: R22 000                        Omset: R299,600                       

Die afrisim veiling het nie afgeloop soos wat ons gehoop het nie, maar ons werk daaraan om meer vroulike diere op die veiling aan te bied.

12)       2012 Feesvieringe & Gedenkboek (Jan Zyl)

Met die afsterwe van Paul Alberts word die Gedenkdoek eers op die langebaan geskuif. ‘n Gedenkjoernaal sal vroeg in Februarie 2012 uitgebring word. Die feesvieringe sal ook oor ‘n tydperk versprei word deur die jaar. Die program sal kortliks soos volg daarna uitsien:

1. Bylaag in Landbouweekblad

2. Worcester Skou, wat deur Herman Duvenage, Lauren Tissier en Ricus Strauss, President van Worcester Skou, gereël sal word.

3. Vryburg Skou, Chris Goosen en die Kalahari Klub neem die verantwoordelikheid hiervoor.

4. Nampo, Obie du Plessis en die NW Klub gaan Nampo aanpak

5. Thabazimbi Skou sal deur Dr Pieter de Kock & die Noord & Oos TVL Klub gereël word

6. ‘n Nasionale Veiling sal ook gehou word en die Tegniese Komitee en Vrystaat Klub is verantwoordelik vir die Veiling.

7. Die finale Dinee sal te Bloemfontein plaasvind en persone verantwoordelik hiervoor is Pierre Fouché, Lauren Tissier en die Sentrale Klub.  Uitnodigings sal deur die loop van die jaar aan almal gestuur word.

Hiermee my dank aan al die bestuurslede vir julle positiewe gesindheid wat ons 99 bestaanjaar ‘n sukses kon maak. Ek sê ook ‘n baie groot dankie aan almal wat ‘n bydrae gemaak tot sukses, hoe gering, dankie! Sterkte aan families wat geliefdes aan die dood afgestaan het.

Welkom aan al ons nuwe lede ons weet jul gaan nog groot bydraes maak in die Afrikanerbeeswêreld! Ons sien uit na 2011 en ‘n groter 2012!!!!